Iyo ifirimbi ya nyuma ivuze, nta mateka aba agishobora guhindurwa. Hari abaseka, hakaba n’abasigarana amarira. Uyu munsi, ni Espagne yishimira intambwe ikomeye, mu gihe u Bufaransa busoje urugendo rwabwo mu gikombe cy’isi mu buryo butari bwitezwe. Byose byatangiriye ku mukino abantu benshi batekerezaga ko Abafaransa ari bo baza kuba bawugenzura, ariko iminota yakurikiyeho yerekanye indi nkuru itandukanye rwose.
U Bufaransa bwinjiye muri uyu mukino buvugwa nk’imwe mu makipe afite amahirwe menshi yo kwegukana igikombe. Bwari bufite abakinnyi b’inararibonye, impano nyinshi ndetse n’icyizere cy’abafana. Ariko ibyo byose ntibyabujije Espagne kwandika amateka yayo.
Kuva umukino watangira, Espagne yagaragaje ituze n’ubushake bwo kugenzura umupira. Nta gihunga yari ifite imbere y’amazina akomeye y’u Bufaransa, ahubwo yakomeje gukina umukino wayo kugeza ibonye igitego cya mbere.
Icyo gitego cyahinduye isura y’umukino. U Bufaransa bwagerageje kwishyura, ariko amahirwe bwabonaga imbere y’izamu yakomeje kubura umusaruro, mu gihe Espagne yakomezaga gukina ifite icyizere.
Inzozi Z’Abafaransa Zihagarariye Aha
Mu gice cya kabiri, Abafaransa binjiye bashaka kugaruka mu mukino, ariko Espagne yongera kubereka ko yari yiteguye neza. Igitego cya kabiri cyahise gisa n’igifunga burundu umuryango w’icyizere ku ikipe ya Didier Deschamps.
Abafana benshi bari bitezweho kubona Kylian Mbappé ayobora ikipe ye mu kindi gitangaza, ariko uyu munsi ibintu ntibyagenze nk’uko babyifuzaga. Ubwugarizi bwa Espagne bwakomeje kumubuza kubona umwanya uhagije wo guteza akaga izamu,aho umukino warangiye ntanishoti ateye mu izamu.
Iyi ntsinzi ishyize Espagne muri gahunda y’abakandida bakomeye begukana iki gikombe cy’isi 2026. Uburyo yakinnye bwerekanye ikipe ifite gahunda, ituje kandi izi guhatana mu mikino ikomeye.
Ku rundi ruhande, gusezererwa kw’u Bufaransa kwatumye benshi bibaza Ese Espagne yabaye nziza cyane, cyangwa Abafaransa bananiwe gukoresha amahirwe yabo?
Wowe wabibonye ute?
