Ibiro bya Perezida Donald Trump bimaze amezi byitegura ko Aba-Démocrates bashobora kwigarurira ubuyobozi bw’Inteko Ishinga Amategeko. Biri gutegura uko byakomeza gushyira mu bikorwa ibice by’ingenzi bya politiki ye hifashishijwe ububasha bwa Perezida gusa, nk’uko byatangajwe n’umukozi wo muri White House n’abandi bantu babiri bazi iby’iyo gahunda.
Abayobozi bakuru, barimo umuyobozi wungirije wa White House, Stephen Miller, n’ushinzwe ingengo y’imari, Russell Vought, batangiye gukorana n’Ibiro by’Umujyanama mu by’Amategeko muri White House kuva muri Mata. Barimo kureba ibyemezo Trump yafata atabanje gusaba uruhushya rw’Inteko mu bijyanye n’abimukira, amahoro y’ibicuruzwa bitumizwa mu mahanga, ibiciro by’inzu n’imikoreshereze y’amafaranga ya Leta.
Umukozi wo muri White House yavuze ko umujyanama mu by’amategeko wa White House, Will Scharf, n’itsinda rye barimo gusuzuma icyo Trump yakora mu buryo bwemewe n’amategeko atabifashijwemo n’abandi, aho yarenga imbibi z’ububasha bwe, n’uko yashyigikira izo ngamba mu nkiko.
Muri ibyo hari gushyiraho amahoro mashya ku mabuye y’agaciro y’ingenzi no ku bikoresho bitanga ingufu z’umuyaga bitumizwa mu mahanga. Hari kandi gukaza amabwiriza ya viza z’abanyeshuri mpuzamahanga n’abakozi b’abanyamahanga bakora by’agateganyo, no gufata ingamba zigamije kugabanya ibiciro by’inzu n’ubwubatsi.
Abantu babiri bazi iby’iyo myiteguro bavuze ko Vought, uyobora Ibiro bishinzwe Ingengo y’Imari, arimo kureba ibikorwa byihutirwa byakomeza gukorwa hakoreshejwe amafaranga Inteko yari yaramaze kwemeza. Bongeyeho ko ashaka guhindura amabwiriza agenga inkunga za Leta, kugira ngo abayobozi bashyizweho na Perezida bagire uruhare runini mu kugena gahunda zihabwa amafaranga. Ibyo bishobora guha White House ububasha bwo gukoresha amafaranga ya Leta bidasabye uruhushya rw’Inteko.
Umukozi wo muri White House yavuze ko Trump yahawe amakuru kuri iyo myiteguro kandi ko yagiye no mu biganiro biyerekeyeho. Umwe mu bazi iby’iyo gahunda, abajijwe niba Trump yumva uko yakomeza gutegeka akoresheje ububasha bwa Perezida mu gihe Inteko yaba iyobowe n’Aba-Démocrates, yasubije ati “Abyumva neza cyane.”
Iyi myiteguro ishingiye ku matora yo hagati muri manda azaba ku wa Kabiri. Kwigarurira Inteko byaha Aba-Démocrates ububasha bwo gukora iperereza kuri Trump, kubuza ko amategeko amushyigikira atorwa no kugabanya ubushobozi bwe bwo gukoresha amafaranga ku bimushishikaje. Icyakora, yakomeza kugira ububasha bukomeye ku bucuruzi, politiki y’ububanyi n’amahanga no ku bakozi ba Leta, ububasha yakoresheje cyane muri manda ye ya kabiri.
Aba-Républicains bafite imyanya 218 kuri 214 mu Nteko y’Abadepite na 53 kuri 47 muri Sena. Ubushakashatsi bw’ibitekerezo by’abaturage buha amahirwe Aba-Démocrates mu matora y’Abadepite, naho muri Sena amahirwe arahanganye cyane ku buryo bigoye kumenya uzatsinda.
Mu kwezi gushize, Trump yazengurutse igihugu yiyamamaza, asaba abaturage gukomeza guha Aba-Républicains ubuyobozi bw’Inteko. Mu gihe cyose, abamufasha bari mu myiteguro y’ibanga yerekana ko biteze ko politiki yo mu 2027 izaba itandukanye cyane.
White House yamaganye ibivugwa ko Aba-Républicains bashobora gutsindwa, inashinja ibitangazamakuru gukwirakwiza amakuru atari yo. Umuvugizi wayo, Lauren Bis, yagize ati “Ubu butegetsi n’Aba-Républicains bashyira mu gaciro bazakomeza kurinda imipaka yacu, kugarura iyubahirizwa ry’amategeko n’umutekano, gusubiza amafaranga menshi mu mifuka y’Abanyamerika bakorana umwete no kugeza ku Banyamerika ibyo bemerewe.”
Ibyo Trump amaze gukora kuva asubiye ku butegetsi.
Kuva asubira ku butegetsi muri Mutarama 2025, Trump yagerageje imbibi z’ububasha bwa Perezida. Yashyizeho amahoro akomeye ku bicuruzwa bitumizwa mu mahanga, akaza ibikorwa byo gukurikirana abimukira, agabanya abakozi ba Leta, akurikirana intego za politiki y’ububanyi n’amahanga, harimo intambara yo kurwanya Iran, atabanje kwemererwa n’Inteko cyangwa gusaba amategeko mashya.
Itegeko rikomeye yabonye ryemejwe n’Inteko yayoborwaga n’Aba-Républicains, rigabanya imisoro ndetse rikagena imikoreshereze y’amafaranga, akaryemeza ku mugaragaro muri Nyakanga 2025.
