Mu gihe abanyapolitiki benshi basezeranya stade nshya, amakipe akomeye cyangwa impinduka zikomeye muri siporo, Perezida wa Ecuador, Daniel Noboa, yahisemo gukora ikintu cyoroshye ariko cyahise gikundwa n’abaturage benshi.
Mu birori byabereye mu ruhame, Noboa yatangaje ko guverinoma ye igiye gukuraho by’agateganyo umusoro wihariye washyirwaga ku binyobwa bisembuye mu gihe cyose cy’igikombe cy’isi. Iyi gahunda yatangiye guhita ishyirwa mu bikorwa kandi izakomeza kugeza ku mukino wa nyuma uteganyijwe ku wa 19 Nyakanga.
Ibi bivuze ko ibiciro bya byeri n’ibindi binyobwa bifatwa nk’ibikoreshwa mu buryo bugereranyije bishobora kugabanukaho kugeza kuri 20%, ibintu byahise bishimisha abakunzi b’umupira w’amaguru n’abacuruzi.
Noboa yavuze ko intego y’iki cyemezo ari ukuba hafi y’abaturage mu gihe cy’ibirori bikomeye nk’Igikombe cy’Isi, aho abantu benshi bahurira hamwe barebana imikino n’inshuti ndetse n’imiryango yabo.
Icyemezo cyakiriwe neza kurusha uko benshi babyumvaga
Mu gihe bamwe bari biteze amatangazo akomeye ajyanye na siporo cyangwa ibikorwa remezo, icyemezo cyo kugabanya igiciro cy’ibinyobwa ni cyo cyahise gikurura ibitekerezo byinshi ku mbuga nkoranyambaga.
Abakoresha internet muri Ecuador ntibatinze kugaragaza ibyishimo byabo. Hari abavuze ko mu gihe umupira utanga ibyishimo ku kibuga, iki cyemezo cyo cyahise gitanga impamvu yihariye yo kukireba bafata ka manyinya.
Nubwo hari abashobora kubona iki cyemezo nk’icyoroheje, ku baturage benshi kizagira ingaruka zihuse mu buzima bwa buri munsi mu gihe bazaba bakurikirana imwe mu mikino ikurikirwa cyane ku isi.
Kuri bamwe, igikombe cy’isi kizaba kirimo ibitego n’amarangamutima. Ku bandi, kiri kuba igihe cyo kwizihiza ko ibiciro bya byeri byagabanutse.
