Inzego z’umutekano za Uganda zatangaje ko zafashe umugabo witwa Mujurizi Moses, ukekwaho kwica abantu 38 hagati ya 2010 na 2025, ndetse bivugwa ko yabariye.
Umugaba Mukuru w’Ingabo za Uganda, Gen Muhoozi Kainerugaba, yabitangaje kuri X, avuga ko yishimiye kumenyesha abaturage ko uwo ukekwaho ibyaha yafashwe.
Yamwise umwicanyi ruharwa kandi uwa mbere mu kurya abantu mu mateka ya Uganda. Yavuze ko ibyo byaha byakorewe mu turere twa Masaka, Ibanda na Kazo.
Muhoozi yongeyeho ko Mujurizi azaburanishwa mu ruhame, kandi ko nta gushidikanya ko azakatirwa igihano cy’urupfu. Yavuze kandi ko abicanyi bo muri Uganda bazashakishwa bagafatwa.
Ibyo ashinjwa.
Abashinzwe iperereza muri ako karere bavuga ko Mujurizi yakoze ubwicanyi bw’uruhererekane (serial killer). Bivugwa ko yibasiraga imiryango akica abayigize bose abatemye. Bivugwa kandi ko ari we, afatanyije n’abandi, wishe umushumba w’itorero rya Pentekote, Steven Mugambe, bagatema abantu bose bari mu nzu bagapfa.
Mu bindi bihe, bivugwa ko yashukaga abo yari agiye kwica abasezeranya urukundo, hanyuma akabica.
Yari yarafashwe mbere.
Bivugwa ko Mujurizi yafashwe inshuro nyinshi mu bihe byashize, ariko agatoroka cyangwa akarekurwa mu buryo butavuzweho rumwe. Nyuma y’iri fatwa, bivugwa ko abayobozi bakuye ibimenyetso bifatika mu rugo rwe.
Abashinzwe iperereza barimo gusuzuma kandi izindi mfu z’abantu baburiwe irengero, kugira ngo bamenye niba zifitanye isano n’ubugizi bwa nabi bwe. Ibi bizasaba ko hatangwa ibirego mu nkiko bimushinja.
