Mu gihe ibihugu byinshi ku isi biri mu mwaka wa 2026, Ethiopia yo yatangiye umwaka wa 2019, hakurikijwe kalendari yayo gakondo.
Uyu munsi uzwi nka Enkutatash, uba ku munsi wa mbere w’ukwezi kwa Meskerem, ari na wo ufatwa nk’intangiriro y’umwaka mushya muri Ethiopia. Ni umunsi wizihizwa mu buryo bukomeye, aho abantu basangira, bagasura imiryango n’inshuti, abana bakaririmba indirimbo gakondo ndetse hakaba n’ibirori bitandukanye.
Kuki Ethiopia iri muri 2019?
Kalendari ya Ethiopia itandukanye n’ikoreshwa henshi ku isi, izwi nka Gregorian calendar. Kalendari ya Ethiopia igizwe n’amezi 12 y’iminsi 30 buri kwezi, hakiyongeraho ukwezi kwa 13 kwitwa Pagume, kugizwe n’iminsi 5 cyangwa 6 bitewe n’uko umwaka ungana.
Iyi kalendari ishingiye ku buryo bwa kera bwo kubara imyaka, ari na yo mpamvu umwaka wayo uba inyuma y’uwa Gregorian ho hafi imyaka 7 kugeza kuri 8.
Enkutatash iza mu gihe kidasanzwe
Enkutatash kandi ihurirana n’igihe imvura iba irangiye muri Ethiopia. Imisozi n’ibibaya bitangira kongera kuba bitoshye, ahantu henshi hakarangwa n’indabo z’umuhondo zizwi nka Adey Abeba.
Ibi bituma umwaka mushya udafatwa gusa nk’impinduka y’umubare w’umwaka, ahubwo unahuzwa n’itangira ry’igihe gishya mu buzima no mu bidukikije.
Ethiopia kandi ni kimwe mu bihugu bike ku isi bikomeje gukoresha kalendari yihariye mu buzima bwa buri munsi, harimo mu kwandika amatariki y’ingenzi, nubwo kalendari ya Gregorian nayo ikoreshwa mu bikorwa mpuzamahanga.
Melkam Addis Amet – Umwaka mushya muhire kuri Ethiopia.
