Abacuruzi bato n’abaciriritse bakomeje gukenera igishoro cyo kwagura ibikorwa byabo, mu gihe u Rwanda rwemerewe miliyoni 80 z’amadolari ya Amerika, ahwanye na miliyari 118 Frw, yo kongera ubushobozi bwa gahunda ifasha ibigo kubona inguzanyo.
Aya mafaranga yatanzwe binyuze mu masezerano y’inyongera hagati y’u Rwanda n’Ikigo Mpuzamahanga gishinzwe Iterambere (IDA), ishami rya Banki y’Isi rifasha ibihugu bikiri mu nzira y’amajyambere.
Amafaranga azakoreshwa mu buryo butandukanye
Muri iyi nkunga y’inyongera, miliyoni 31.5 z’amadolari zagenewe gufasha ibigo kubona inguzanyo zo gukoresha mu bikorwa bya buri munsi no gushora imari. Andi miliyoni 14 z’amadolari azashyirwa mu kigega cy’ingwate kigamije kugabanya ibyago ku bigo by’imari bitanga inguzanyo.
Miliyoni 3 z’amadolari zagenewe ibigo bifite ibibazo by’igihe gito by’amafaranga, mu gihe miliyoni 30 z’amadolari zizakoreshwa mu buryo bugamije gukurura abashoramari bigenga no kongera amafaranga ibigo bishobora kubona.
Aya mafaranga ari muri gahunda ya Access to Finance for Recovery and Resilience Project, yatangiye mu 2021 hagamijwe gufasha ibigo guhangana n’ingaruka za COVID-19.
Ese umucuruzi azabona inguzanyo yoroshye?
Kuba u Rwanda rwemerewe aya mafaranga ntibivuze ko azahita ahabwa abacuruzi bose, cyangwa ko azatangwa nk’inkunga idasubizwa.
Icyitezwe ni uko gahunda izafasha ibigo kubona inguzanyo binyuze mu bigo by’imari no kugabanya zimwe mu nzitizi bituma byangirwa amafaranga yo kwagura ibikorwa.
Icyakora, ibisabwa kugira ngo ikigo cyemererwe inguzanyo, inyungu kizishyura n’igihe gusaba bizatangirira ni amakuru agomba gusobanurwa n’inzego zizashyira iyi gahunda mu bikorwa.
Amasezerano y’iyi nkunga yemejwe n’Itegeko No 052/2026 ryo ku wa 9 Ukwakira 2026, ryatangajwe mu Igazeti ya Leta ku wa 15 Ukwakira.
