Ikipe y’Igihugu y’u Rwanda, Amavubi, yashyize ahagaragara urutonde rw’agateganyo rw’abakinnyi bazifashishwa mu mikino ya FIFA Series 2026.
Uru rutonde ni rumwe mu byemezo bya mbere by’umutoza mushya w’Amavubi, Stephen Constantine, uherutse kugirwa umutoza mukuru w’iyi kipe y’igihugu. Uyu mutoza yahisemo kuvanga abakinnyi basanzwe bafite ubunararibonye n’abakiri bato bari kuzamuka, bakina mu makipe atandukanye haba mu Rwanda no hanze yarwo.
Abanyezamu
Mu izamu hatoranyijwe abakinnyi bane barimo Fiacre Ntwari ukinira Kaizer Chiefs yo muri Afurika y’Epfo. Hari kandi Hugo Bigirimana wa FC La Chaux-de-Fonds, Patience Niyongira ukinira Police FC ndetse na Adolphe Hakizimana wa APR FC.
Abakinnyi b’inyuma
Mu bwugarizi hagaragaramo amazina asanzwe azwi mu Amavubi nka Ange Mutsinzi ukinira Zira FK na Thierry Manzi wa Al Ahly Tripoli.
Abandi bahamagawe barimo Phanuël Kavita Mbaya ukinira Birmingham Legion FC, Yunus Nshimiyimana wa APR FC, Emmanuel Imanishimwe ukinira Aris Limassol FC, Claude Niyomugabo na Jean Gilbert Byiringiro b’APR FC ndetse na Obed Uwumukiza wa Rayon Sports FC.
Abakina hagati mu kibuga
Mu kibuga hagati hagaragaramo abakinnyi bakomeye basanzwe bakinira Amavubi barimo Bonheur Mugisha wa Al Masry SC na kapiteni Djihad Bizimana ukinira CS Constantine.
Hari kandi Kevin Muhire wa RAAL La Louvière, Samuel Gueulette Muhire ukinira Jamus FC, Sven Kalisa wa FC Etzella Ettelbruck, Jean Bosco Ruboneka wa APR FC, Hakim Sahabo ukinira AEK Athens FC ndetse na Rene Uwinezere wa Kiyovu Sports.
Abasatira izamu
Mu basatira izamu hatoranyijwe abakinnyi batandukanye barimo Jojea Kwizera ukinira Rhode Island FC. Hari kandi abavandimwe b’impanga Joy Lance Mikels wa Səbail FK na Joy Slayd Mikels ukinira FK Karvan.
Abandi bahamagawe ni Karl Matteo Ndayishimiye wa KVC Wilrijk, Innocent Nshuti wa Al Masry Ajdabiya, Abeddy Biramahire wa Assabah FC, Johan Jacques Mikels wa AC Bellinzona, Johan Marvin Kury wa NK Veres Rivne, David Niyo wa AC Bellinzona ndetse na Gilbert Mugisha wa APR FC.
Intangiriro y’ikiragano gishya ku Amavubi:
Iri hamagarwa ry’agateganyo ritanga icyizere ku mushinga mushya w’Amavubi uyobowe na Stephen Constantine. Uru rutonde rugaragaza ko hari uruvange rw’abakinnyi bakina mu makipe akomeye yo mu Rwanda nka APR FC na Rayon Sports FC ndetse n’abakina hanze y’igihugu.
Abafana b’Amavubi bategereje kureba urutonde rwa nyuma ruzatoranywa, mu gihe iyi kipe y’igihugu yitegura guhagararira u Rwanda mu mikino ya FIFA Series 2026. Nubwo bimeze bitya urutonde rw’agateganyo rwahamagawe akenshi usanga ari narwo ruba urwanyuma bitaba ibyo hakongerwamo abandi bake.
Uru rutonde kandi ntirwagaragayeho Umunyezamu kwizera Olivier wa Rayon sports umaze iminsi yitwara neza,benshi bakibaza impamvu. Ibitera.Amakuru avuga ko kwizera hari imyitwarire itari myiza yagaragaje ubwo yari mumwiherero w’amavubi uheruka akaba aribyo bituma atarongera guhamagarwa ndetse guhamagarwa kwe kukaba kukiri kure.
