Buri gihe iyo hagiye kuba Igikombe cy’Isi, haba hari ibyishimo ku bahamagawe n’agahinda ku basigaye. Ariko hari imyaka biba bikabije kurusha indi. Mu gihe amakipe y’ibihugu yatangaje urutonde rw’abakinnyi azifashisha muri FIFA World Cup 2026, abantu benshi ku mbuga nkoranyambaga batunguwe no kubona amazina amwe n’amwe atarimo.
Hari abasigaye hanze kubera amahitamo y’abatoza, abandi kubera uburyo bakinnyemo mu mwaka ushize, ariko hari n’abatuma abantu bibaza niba koko ibyemezo byafashwe bifite ishingiro.
Kudasanga Harry Maguire mu Bwongereza byatunguye benshi
Mu myaka ishize, byari bigoye gutekereza ikipe y’u Bwongereza yitabiriye amarushanwa akomeye itarimo Harry Maguire.
Nubwo yakunze kunengwa n’abafana, Maguire yari umwe mu bakinnyi bafite ubunararibonye bukomeye mu marushanwa mpuzamahanga. Gusa umutoza mushya Thomas Tuchel yahisemo kubaka ikipe ishingiye ku bakinnyi bihuta kandi bashobora gukina umupira wa moderne ushingiye ku gitutu gikomeye.
Hari abafana bavuga ko igihe cya Maguire cyari cyarangiye, ariko abandi bemeza ko gusiga umukinnyi ufite uburambe nk’ubwo mbere y’Igikombe cy’Isi ari icyemezo gishobora kuzagaruka kikababaza.
Phil Foden na we yasigaye hanze
Niba hari izina ryateye impaka kurusha andi mu Bwongereza, ni irya Phil Foden.
Uyu mukinnyi wari umaze imyaka itari micye afatwa nk’umwe mu bafite impano idasanzwe muri Premier League, benshi ntibumva ukuntu atabashije kubona umwanya mu ikipe izajya mu Gikombe cy’Isi.
Abafana benshi bibajije ikibazo kimwe:
“Ni gute umukinnyi ufite impano nk’iya Foden ashobora kurebera Igikombe cy’Isi kuri televiziyo?”
Brazil nayo ntiyabuze impaka
Mu Brazil, impaka zikomeye zagarutse ku cyemezo cya Carlo Ancelotti cyo gusiga hanze Antony.
Antony yari amaze igihe agaragaza urwego rwiza muri shampiyona ya Espagne akinira ikipe ya Real Betis. Imibare ye yari myiza kurusha bamwe mu bakinnyi bahamagawe.
Icyakora icyarushijeho gutera impaka ni uko Neymar yahamagawe nubwo amaze igihe ahanganye n’imvune ndetse atakigaragaza urwego rwamumenyekanishije.
Hari abavuze ko Neymar yahamagawe kubera izina rye n’amateka ye, aho guhamagarwa hashingiwe ku mikinire y’ubu.
João Pedro na we ntiyahiriwe
Undi mukinnyi watunguye benshi ni João Pedro.
Nubwo yari amaze igihe yitwara neza, ntiyabonye umwanya mu ikipe ya Brazil. Benshi bavuga ko niba Brazil izagira ikibazo cyo gutsinda ibitego muri iri rushanwa, abantu bazahita bibuka amazina nka João Pedro na Antony.
Marcus Rashford na Jack Grealish
Ku ruhande rw’u Bwongereza, Marcus Rashford na Jack Grealish nabo basigaye hanze.
Mu myaka mike ishize, byari kugorana gutekereza ikipe y’u Bwongereza itarimo aba bakinnyi bombi.
Ariko imvune, kugabanuka kw’iminota bakinaga ndetse n’ihangana rikomeye hagati y’abakinnyibataha izamu byatumye basigara.
Gusa hari abafana bemera ko mu mikino yo gukuranwamo, abakinnyi nka Rashford bashobora guhindura umukino mu munota umwe, ari na yo mpamvu hari ababona ko basizwe hanze bitumvikana.
Aya mahitamo ashobora kuzibukwa kurusha ibikombe
Muri iki gihe cy’imbuga nkoranyambaga, ibyemezo by’abatoza ntibikiri ibanga.
Mu minota mike nyuma yo gutangaza urutonde rw’abakinnyi, abafana baba bamaze kugereranya imibare, kureba amashusho no kunenga cyangwa gushima ibyemezo byafashwe.
Kandi amateka ya ruhago atwereka ko hari igihe abatoza bagarukwaho cyane, kubera kwibeshya mu guhitamo abakinnyi bajyana, nabo basiga.
Niba u Bwongereza cyangwa Brazil bitazitwara neza muri iri Gikombe cy’Isi, ikibazo kizahita kigaruka:
Ni gute abakinnyi nka Harry Maguire, Phil Foden, Antony, João Pedro, Marcus Rashford na Jack Grealish basigaye iwabo?
Kuko muri ruhago, hari igihe rimwe na rimwe impaka ziterwa n’umukinnyi wasizwe hanze ziba nini cyane ku buryo abantu bamwibuka igihe kirekire, nk’uko bibuka abakinnyi batsinze cyangwa batwaye igikombe.
Urugero: Niba u Bwongereza butsindwa kare muri World Cup 2026, abantu bashobora kumara imyaka bavuga bati:
“Iyo Phil Foden aza kujyanwa ibintu byari kuba bitandukanye.”
