Mu gihe benshi bari basanzwe bavuga ko Amavubi adafite amahirwe yo kongera kurota igikombe cya Afurika, tombora y’amajonjora ya CAN 2027 yasize abafana benshi bongera kugira icyizere. U Rwanda rwisanze mu itsinda K hamwe na Mali, Cape Verde na Liberia, ibintu byatumye benshi batangira kwibaza niba igihe cyo kubona Amavubi muri CAN cyaba finally kigeze.
Nubwo Mali isa nk’ikipe ikomeye kurusha izindi muri iri tsinda, uko ibintu bihagaze ntabwo U Rwanda rwabonye tombora mbi nk’uko bamwe babitekerezaga. Ahubwo hari impamvu nyinshi zituma benshi batangiye kuvuga ko Amavubi ashobora gutanga surprise maze akabona itike ya CAN 2027 izabera muri Kenya, Uganda na Tanzania.
Ikintu cya mbere gitanga icyizere ni uko U Rwanda rutaguye mu matsinda arimo ibihugu bizakira iryo rushanwa. Ibi bifite akamaro kanini kuko ayo matsinda azakurwamo ikipe imwe gusa, mu gihe itsinda ririmo Amavubi hazazamuka amakipe abiri ya mbere. Ibyo bivuze ko amahirwe yo gukomeza yiyongereye cyane.
Abenshi kandi baremera ko Cape Verde na Liberia atari amakipe ateye ubwoba nk’ayahoze ari ibihangange bya Afurika. Yego bafite abakinnyi beza kandi bafite uburambe, ariko ntabwo ari amakipe U Rwanda rudashobora gutsinda. Mu myaka yashize, Amavubi yagiye agaragaza ko ashobora guhagarara neza imbere y’amakipe akomeye ndetse rimwe na rimwe akanatungura benshi.
Hari kandi indi mpamvu iri gutuma abafana bongera kwizera ikipe y’igihugu: impinduka zimaze igihe zikorwa mu Amavubi. Umutoza Steffan Constantine yavuze inshuro nyinshi ko intego ye ari ukugeza U Rwanda muri CAN 2027, kandi bisa nk’aho atari amagambo gusa.
Mu minsi yashize, Amavubi yongeyemo amaraso mashya cyane cyane mu busatirizi. Abakinnyi bashya nka Mickels n’abandi bagaragaje ibintu byiza mu mikino ya FIFA Series yabereye i Kigali, ibintu byahaye abafana icyizere ko ikipe iri kubakwa mu buryo bushya.
Stade Amahoro Nayo Ishobora Kuba Intwaro Ikomeye
Ikindi gikomeje kuvugisha benshi ni ukuboneka kwa Stade Amahoro nshya. Kuba U Rwanda rufite stade iri ku rwego rwo hejuru bishobora gufasha cyane Amavubi mu mikino yo mu rugo. Gukina imbere y’abafana benshi i Kigali bishobora guha ikipe imbaraga zidasanzwe, cyane cyane mu mikino ikomeye yo gushaka amanota.
Mu majonjora nk’aya, akenshi gutsindira mu rugo ni cyo gitandukanya amakipe akomeza n’asezererwa. Niba Amavubi azashobora gukoresha neza imikino yayo ya Kigali, amahirwe yo kujya muri CAN azazamuka cyane.
Nubwo Mali ikomeje gufatwa nk’iyo kwitonderwa cyane muri iri tsinda, hari abasesenguzi bavuga ko umwanya wa kabiri ushobora kurwanirwa cyane hagati y’u Rwanda na Cape Verde. Liberia nayo ntabwo ikwiye gusuzugurwa, ariko Amavubi afite amahirwe yo kwitwara neza kurusha uko benshi babyibwira.
Ikindi gitanga icyizere ni uko muri iyi myaka ya nyuma umupira w’amaguru w’u Rwanda watangiye kuzamuka buhoro buhoro. Hari abakinnyi benshi bari kubona amahirwe hanze y’igihugu, abandi bakazamura urwego muri shampiyona y’imbere mu gihugu. Iyo ubyongeraho abafana bafite inyota yo kubona ikipe yabo muri CAN, ubona neza ko hari ibintu byinshi bishobora gufasha Amavubi gukora amateka.
Birumvikana ko urugendo rutazaba rworoshye. Hazabaho imikino ikomeye hanze y’u Rwanda ndetse n’igitutu kizaba kinini. Ariko iyo urebye iri tsinda neza, ntabwo ari inzozi kuvuga ko Amavubi ashobora kurangiza nibura ku mwanya wa kabiri.
Abafana benshi ubu basigaye bibaza ikibazo kimwe gusa: ese igihe cyo kubona Amavubi muri CAN kirageze koko?
Niba ikipe izakomeza gukina ifite umutima, umutoza agahuza neza abakinnyi bashya n’abasanzwe, kandi abafana bagakomeza kuyitera ingabo mu bitugu, CAN 2027 ishobora kuba irushanwa rya mbere rikomeye U Rwanda ruzagaragaramo nyuma y’imyaka myinshi rutegereje ayo mateka.
