Mu gihe isi yose iri guhatanira amabuye y’agaciro akenewe mu ikoranabuhanga rigezweho n’imodoka zikoresha amashanyarazi, Repubulika Iharanira Demokarasi ya Congo (DRC) yongeye kugaragaza ko ishaka kuba igihangange kitazigera gisimburwa muri uru rugamba.
Leta ya Congo iri mu biganiro bikomeye n’ikigo cya Leta y’u Bushinwa gifitanye isano na China Railway Group Ltd CREC, ku mushinga mushya ushobora kuba umwe mu mishinga minini ya copper ku isi.
Umushinga ushobora guhindura amateka ya Congo
Nk’uko byatangajwe na Bloomberg, ibiganiro hagati y’iki kigo cy’Abashinwa na Minisitiri w’Ubucukuzi bw’Amabuye y’Agaciro wa Congo, Louis Watum, byibanze ku mushinga uteganyijwe kuzajya utanga hagati ya toni 200,000 na 500,000 za copper buri mwaka.
Iyo mibare ifatwa nk’idasanzwe, kuko ishobora gutuma Congo irushaho gukomera ku mwanya wayo nk’igihugu cya kabiri ku isi gitanga copper nyinshi nyuma ya Chile.
Kasai-Oriental ishobora kuba ikigo gishya cy’ubucukuzi
Igitangaje muri uyu mushinga ni uko utazubakwa muri Katanga, ahasanzwe hibanda ubucukuzi bwa copper muri Congo, ahubwo uzajya muri Kasai-Oriental.
Iyi ntara yari isanzwe izwi cyane kubera diyama, ariko ubu ishobora guhinduka igicumbi gishya cya copper.
Abasesenguzi bavuga ko ibi bishobora guhindura ubukungu bw’aka karere ndetse bikazana ibikorwa remezo bishya, imihanda n’akazi ku baturage benshi.
Ubushinwa bukomeje kwagura imbaraga muri Congo
Uyu mushinga uteganyijwe gukorwa ku bufatanye hagati y’ishami rya CREC na MIBA, ikigo cya Leta ya Congo kizwi cyane mu bucukuzi bwa diyama.
Ubushinwa busanzwe bufite ijambo rikomeye mu bucukuzi bwa Congo, cyane cyane binyuze muri Sicomines, umwe mu mishinga minini yashinzwe mu masezerano yo guhana amabuye y’agaciro n’ibikorwa remezo hagati ya Congo n’u Bushinwa.
Ibi bituma benshi bibaza niba Congo iri kurushaho kugwa mu maboko y’Abashinwa cyangwa niba iri gukoresha iri rushanwa mu nyungu zayo.
Amerika nayo iri gushaka umwanya
Mu gihe Ubushinwa bukomeje kwigarurira isoko ry’amabuye y’agaciro muri Congo, Leta Zunze Ubumwe za Amerika nazo zatangiye kongera ibikorwa byazo muri iki gihugu.
Mu kwezi kwa Ukuboza gushize, Leta ya Perezida Félix Tshisekedi yasinyanye amasezerano na Washington azaha abanyamerika amahirwe yihariye mu gushora imari mu mabuye y’agaciro ya Congo.
Ibi byerekana uburyo Congo iri kuba igihugu gikomeye mu rugamba rw’ubukungu n’imbaraga hagati y’ibihugu bikomeye ku isi.
Copper yahindutse zahabu nshya y’isi
Uko isi igenda yinjira mu gihe cy’imodoka zikoresha amashanyarazi n’ingufu zisubira, copper yabaye kimwe mu bintu bikenewe cyane.
Ikoreshwa mu gukora imodoka z’amashanyarazi, imirasire y’izuba, bateri n’ibindi bikoresho by’ikoranabuhanga.
Ni yo mpamvu ibihugu bikomeye ku isi biri guhatanira kugira aho bihagaze muri Congo, igihugu gifite umutungo kamere udasanzwe.
Ese Congo igiye kuba igihangange m’ubukungu?
Mu myaka 10 ishize, umusaruro wa copper muri Congo wikubye inshuro zirenga eshatu.
Perezida Félix Tshisekedi arashaka gukomeza kwagura uru rwego kugira ngo igihugu cye kitaba gusa igihugu gitanga amabuye y’agaciro, ahubwo kibe umufatanyabikorwa ukomeye mu bukungu bw’isi.
Abasesenguzi bavuga ko uyu mushinga mushya ushobora gutuma Congo iba imwe mu nkingi z’ubukungu bushya bw’isi bushingiye ku ikoranabuhanga n’ingufu zisubira.
Niba uyu mushinga uzashyirwa mu bikorwa, ushobora guhindura amateka ya Congo no kuyigira kimwe mu bihugu bikomeye cyane mu bucukuzi bw’amabuye y’agaciro ku isi.
Ariko ikibazo gikomeje kwibazwa ni kimwe
Ese umutungo kamere wa Congo uzafasha abaturage bayo gutera imbere, cyangwa uzakomeza kugirira akamaro ibihugu bikomeye n’amasosiyete yo hanze gusa?
