Nyuma y’imyaka hafi icumi atarasohora album nshya, umuhanzi w’icyamamare Rihanna yongeye kuvugisha abakunzi be ubwo yatangazaga ko ari gukora ku album ye ya 9. Ariko mu gihe abafana bari mu byishimo bitewe n’ayo makuru, habaye igikorwa cyateye impungenge cyabereye ku rugo rwe muri Amerika.
Imyaka 10 Rihanna atarasohora album
Album ya nyuma ya Rihanna yitwa Anti yasohotse mu mwaka wa 2016. Kuva icyo gihe, uyu muhanzikazi ntiyahagaritse gukora ibikorwa bitandukanye by’ubucuruzi ndetse no kubaka ubuzima bw’umuryango we.
Rihanna ari mu rukundo n’umuraperi A$AP Rocky, aho bombi bamaze kubyarana abana batatu:
- Mu 2022 bibarutse umwana wabo wa mbere w’umuhungu
- Mu 2023 bibaruka umwana wa kabiri w’umuhungu
- Mu 2025 bibaruka umwana wa gatatu w’umukobwa
Ku wa 27 Gashyantare 2026, Rihanna yatangaje ko ari gukora kuri album ye nshya ya 9, anagaragaza amashusho ari muri studio. Nubwo yemeje ko iri hafi kurangira, ntiyatangaje itariki izasohokeraho.
Kurasa kwabereye ku nzu ye
Mu gihe abafana bari bagishimishijwe n’ayo makuru, mu ijoro ryo ku Cyumweru tariki 8 Werurwe 2026, habaye igikorwa cyateye ubwoba ku nzu ya Rihanna i Beverly Hills, hafi ya Los Angeles.
Umugore uri mukigero cy’imyaka 30:
- Yarasiye amasasu menshi (hafi 7–10) ku nzu ya Rihanna
- Yari ari mu modoka ubwo yarasaga
- Yifashishije imbunda yo mu bwoko bwa AR-15
Icyakora, nubwo Rihanna yari mu nzu icyo gihe, nta muntu n’umwe wakomeretse.
Polisi yahise ifata ukekwaho icyaha
Polisi yahise itabara vuba, ifata uwo mugore nyuma y’igihe gito. Kugeza ubu, iperereza riracyakomeje kugira ngo hamenyekane impamvu yamuteye gukora icyo gikorwa.
Nubwo habayeho icyo gitero cyateye ubwoba, amakuru avuga ko Rihanna n’umuryango we bose bakomeje kuba amahoro, mu gihe abakunzi be bakomeje gutegereza album ye nshya.
